Schnitzelbangg: Dr Spitzbueb fasst das Magazin zusammen

Bruucht s denn Muet, e Bangg z beraube?
Duet diir daas d Gedangge raube?
Die einte finde s nämlig schlächt.
Die andre halte s mit em Brächt.

Dää Aggrobaat, duesch mit em bange:
Schafft er s uff die Faanestange?
Glingt dä Sprung, blybt er e Draum?
Ych schaff scho kuum e Burzelbaum.
Muetig isch, in allne Laage,
könne «Nai» zu eppis saage.

Oder «Joo», au daas bruucht Muet;
wenn me nämlig s richtig duet.
Muetig, epperem d Liebi z schängge,
und d Bezieig nid z versängge,
bim erschte Mool, wo s holbberet;
nid grad uusestolbberet.

Muetig isch, fir s Klima yyzstoo,
eifach friidlig, ooni dryyzschloo.
Bi de Ressurse gscheiter wäärde.
Will, s git jo kei zwaiti Äärde.

Doo driiber sinn mr is im Klaare.
Sunscht kaasch dr s Spaare jo denn spaare.